ជប៉ុន៖ ឯកអគ្គរាជទូតជប៉ុនប្រចាំនៅសហរដ្ឋអាមេរិក លោក Koji Tomita បានបញ្ជាក់នៅថ្ងៃអង្គារម្សិលមិញនេះថា ប្រទេសជប៉ុនកំពុងមមាញឹកក្នុងកិច្ចការងារឆ្ពោះទៅរកការបើកការិយាល័យទំនាក់ទំនងរបស់ណាតូ (NATO) ប្រចាំនៅទីក្រុងតូក្យូ (Tokyo)។

លោក Tomita បានធ្វើការអធិប្បាយបែបនេះក្នុងព្រឹត្តិការណ៍មួយដែលរៀបចំដោយក្លឹបសារព័ត៌មានជាតិក្នុងទីក្រុងវ៉ាស៊ីនតោន នៅពេលដែលលោកត្រូវបានគេសួរនាំជុំវិញអង្គការសម្ព័ន្ធភាពដែលដឹកនាំដោយសហរដ្ឋអាមេរិកកំពុងមានផែ​នការក្នុងការបើកការិយាល័យទំនាក់ទំនងរបស់ NATO ដែលជាការិយាល័យដំបូងគេបង្អស់នៅអាស៊ី ក្នុងគោលបំណងដើម្បីជួយសម្រួលដល់ការពិគ្រោះយោបល់នៅក្នុងតំបន់អាស៊ី។

យ៉ាងណាមិញ អង្គការ NATO ពុំបានចេញមុខធ្វើការបញ្ជាក់ណាមួយឡើយជុំវិញការចុះផ្សាយ និងមតិយោបល់របស់សារព័ត៌មានជប៉ុនលើបញ្ហានេះ ដោយបញ្ជាក់ថាខ្លួននឹងមិនចូលទៅក្នុងព័ត៌មានលម្អិតណាមួយនៃកិច្ចពិភាក្សារបស់ប្រទេសជាសម្ព័ន្ធមិត្តនោះឡើយ។​ លោក Mitoma ដែលនឹងមានវត្តមានក្នុងកិច្ចប្រជុំកំពូល G7 ដែលនឹងធ្វើឡើងចាប់ពីថ្ងៃទី១៩ ដល់ថ្ងៃទី២១ ខែឧសភា នាទីក្រុង Hiroshima បាននិយាយថា នៅក្នុងកិច្ចប្រជុំខាងមុខនេះក៏នឹងជជែកយ៉ាងជិតស្និទរវាងបណ្តាប្រទេសជាមិត្តដើម្បីទប់ទល់នឹងឥទ្ធិពលរបស់ចិនផងដែរ។ 

បើតាមប្រភពពីសារព័ត៌មាន Nikkei Asia បានបញ្ជាក់ថា ការិយាល័យទំនាក់ទំនងរបស់ NATO នេះអាចនឹងបើកដំណើរការនៅឆ្នាំក្រោយ ហើយនឹងអនុញ្ញាតឱ្យមានការពិភាក្សាជាមួយដៃគូសន្តិសុខរបស់អង្គការណាតូ ដូចជាកូរ៉េខាងត្បូង អូស្ត្រាលី និងនូវែលសេឡង់ ជាមួយនឹងបញ្ហាប្រឈមភូមិសាស្ត្រនយោបាយពីប្រទេសចិន និងរុស្ស៊ី។ គួរបញ្ជាក់ថា ប្រធានអង្គការណាតូលោក Jens Stoltenberg បានទៅបំពេញទស្សនកិច្ចនៅប្រទេសជប៉ុនកាលពីខែមករា ហើយបានសន្យាជាមួយនាយករដ្ឋមន្ត្រី Fumio Kishida ដើម្បីពង្រឹងទំនាក់ទំនងក្នុងការប្រឈមមុខនឹងបញ្ហាសន្តិសុខជាប្រវត្តិសាស្ត្រ ដោយលើកឡើងពីការឈ្លានពានរបស់រុស្ស៊ីលើអ៊ុយក្រែន និងអំណាចយោធាដែលកំពុងកើនឡើងរបស់ចិន។ 

ក្រោយការចុះផ្សាយរបស់ Nikkei Asia ប្រទេសចិនបាននិយាយថា "ការប្រុងប្រយ័ត្នខ្ពស់" គឺចាំបាច់ក្នុងការប្រឈមមុខនឹងការពង្រីកខ្លួនទៅទិសខាងកើតរបស់អង្គការ NATO៕